Førjulsstemning i Skrivarhuset

Velkomen til eit julepynta Skrivarhus!

Til dette arrangementet vil det vera påmelding:

pr telefon/sms til Brita H. Hauso 90123387

pr telefon/sms til Aud Mari Eitrheim 97601366

eller billett: https://tikkio.com/events/63214

Frist for påmelding/kjøp av billett er 09.12.26.

Lajla Storli og John Ole Morken er kjente namn på folkemusikkartet. Begge to er solistar med sterk forankring i sine lokale tradisjonar frå Hardanger og Røros-distriktet. Lajla kjem frå Hardanger og er songar og hardingfelespelar. Ho har eit allsidig repertoar med viser, feleslåttar og stev. Lajla har gjeve ut soloplata «Møya som drøyme», som hausta gode kritikkar. Lajla står også bak folkemusikkens svar på BliMe-dansen; «Danseglede», der ho har skrive tekst og melodi. Våren 2023 kom samlinga Slåttar frå Kvam, Ulvik, Ullensvang og Eidfjord, der Lajla spela inn slåttar for Hardingfele saman med Knut Hamre, Benedicte Maurseth og Annlaug Børsheim. John Ole er felespelar, men trakterer også gitar. Han kjem frå Røros-distriktet der Rørospolsen er eit av hans hjartebarn. Han har spelt inn fleire plater med musikk frå heimtraktene. Dei siste åra har han vore tilsett i NRK som programleiar i programposten Folkemusikktimen på P2. Både Lajla og John Ole har hatt Statens kunstnarstipend. Dei feirar 20 år som duo, og har eit allsidig program med seg. Her får ein høyra tradisjonell folkemusikk og viser med eigne melodiar og tekstar. Dei er båe glade i lyrikk, og har tonesett kjende dikt etter Olav H. Hauge. Det er alltid kjekt å spela i Hardanger, og dei ser fram til å ha ein desemberkonsert på Skrivargarden på Hesthamar.

Etter konserten vert det servert rjomegraut og spekemat, kaffi og jolekaker.

Programmet startar kl. 18.00

Hjarteleg velkomne til ei hyggjestund i førjulstida!